USA: +1-754-4266-3266 / Haïti: +509-4483-9758 | raynaldlouis@gmail.com

Ayiti-Kidnaping : Plizyè enstitisyon nasyonal ak entènasyonal ekzije bandi ak zam lage san kondisyon, plis pase 10 moun yo kidnape samdi 10 ak dimanch 11 avril 2021 an

Pòtoprens, 12 avril 2021 [AlterPresse]— Plizyè enstitisyon nasyonal ak entènasyonal ekzije bandi ak zam lage, prese prese, san kondisyon, plis pase 10 moun yo dappiyanp, samdi 10 ak dimanch 11 avril 2021 an, nan plizyè nòt separe ki rive jwenn AlterPresse.

Konferans ayisyen relijye yo (Chr) di li gen gwo doulè, men sitou anpil kòlè, douvan sitiyasyon malouk, peyi a ap konnen depi plis pase dis lane, alòske reponsab Leta yo montre yo pa kapab pote okenn solisyon nan sityasyon laterè sa a, nan yon nòt pou laprès.

Konferans ayisyen relijye yo rele anmwe douvan zak kidnaping la, pandan l tou profite presize se 5 pè, 2 mè ak 3 manm fanmi yo, ki nan men kidnapè 400 mawozo Kwadèboukè yo.

5 pè yo, se Evens Joseph, Michel Briand, Jean Nicaisse Milien, Joël Thomas ak pè Hugues Baptiste.

2 mè yo, se sè Agnès Bordeau ak Anne Marie Dorcélus, ki se matant pè Arnel Joseph, ak twa manm fanmi pè Arnel Joseph, Oxane Dorcélus ki se manman l, Lovely Joseph ki se sè li, epi Welder Joly ki se parenn pè Arnel Joseph.

Alatèt legliz katolik women nan Pòtoprens mande Leta pran dispozisyon pou fè lage prese prese tout 10 moun sa yo, san yo pa bay yon santim.

Alatèt legliz katolik women nan Pòtoprens kritike konpòtman manfouben otorite piblik yo, douvan zak kidnaping ak vyolans k ap fèt sou moun yo nan peyi a.

Sou bò pa l, Sektè sante ayisyen an (Sesah) di gwo kòlè l epi pwoteste kont kidnaping sou Doktè André Valembrun, 5 pè, 2 mè ansanm ak 3 manm fanmi yo nan wikenn ki sot pase a.

Nan yon nòt pou laprès, Sesah di li konstate, malgre tout mouvman leve kanpe ki fèt nan peyi a, otorite yo pa janm fè okenn aksyon konkrè, pou garanti sekirite popilasyon an.

Sektè sante ayisyen an mande Leta degaje l, kou mèt jan jak, pou fè lage tout moun, bandi ak zam yo kidnape yo.

Plizyè lopiltal, tankou lopital Sainte Trinité ak lopital prive Bernard Mevs, deside fèmen pòt yo, jodi lendi 12 avril 2021 an, pou pwoteste kont kidnaping, samdi 10 avril 2021 an, sou Doktè André Valembrun.

Reponsab lopital sa yo, ki egzije bandi ak zam yo lage san kondisyon Doktè André Valembrun, fè konnen y ap kite pòt yo fèmen, jiskaske yo lage doktè a.

Ministè, ki anchaje tout relijyon yo nan peyi d Ayiti, leve vwa l kont zak kidnaping, ki fèt, dimanch 11 avril 2021 an, sou 5 pè, 2 mè ansanm ak 3 manm fanmi yo.

Detan li leve vwa l kont zak kidnaping sa yo, gouvènman defakto a anonse, yon lòt fwa ankò, l ap travay san pran souf, pou fè bandi ak zam yo lage 5 pè, 2 mè ansanm ak 3 manm fanmi yo.

Konferans monseyè katolik women ak Konferans relijyèz ak relijye yo nan peyi Lafrans mande kidnapè yo lage moun yo kidnape yo.

Pakè tribinal sivil Pari, kapital peyi Lafrans, ki gen konpetans sou krim ki komèt nan peyi etranje kont natif natal peyi Lafrans, louvri yon ankèt, sou zak kidnaping ki fèt sou 10 moun yo, pami yo 2 fransè.

Se Ofis santral lit kont krim òganize k ap mennen ankèt sa a, dapre presizyon pakè tribinal sivil Pari an.

Nan vil Pari, Ministè zafè etranjè anonse sant kriz ak sipò ministè a ak anbasad li nan peyi d Ayiti mobilize, epi nan relasyon avèk otorite lokal yo.

About the Author

Leave a Reply

*