USA: +1-754-4266-3266 / Haïti: +509-4483-9758 | raynaldlouis@gmail.com

Ayiti-Jistis : Anplis pyès nan dosye mèt Monferrier Dorval lan, gen lòt pyès nan plizyè gwo dosye, tankou masak lasalin novanm 2018 lan, ki disparèt nan gref tribinal sivil Pòtoprens lan, dapre Asosyasyon nasyonal grefye ayisyen yo

Pòtoprens, 23 oktòb 2020 [AlterPresse] — Anplis pyès nan dosye, sou kò sasinay, vandredi swa 28 dawout 2020 an, sou mèt Monferrier Dorval lan, gen lòt pyès, nan plizyè gwo dosye, tankou masak lasalin (nan mwa novanm 2018 lan), ki disparèt nan gref tribinal sivil Pòtoprens lan, dapre sa Asosyasyon nasyonal grefye ayisyen yo konfime pou AlterRadio/AlterPresse.

Pyès ki diparèt yo gen rapò ak dosye masak lasalin, dosye chèf gang Arnel Joseph ak dosye ansyen depite Arnel Bélizaire lan, dapre presizyon prezidan asosyasyon grefye ayisyen yo, mèt Martin Ainé.

Bandi ak zam te touye plis pase 70 moun nan Lasalin, Pòtoprens, soti premye pou rive 13 novanm 2018 la, dapre yon rapò Rezo nasyonal k ap defann dwa moun.

Lannuit lendi 19 pou rive madi 20 oktòb 2020 an, gen kèk pyès nan dosye mèt Monferrier Dorval lan, ki disparèt nan grèf tribinal sivil Pòtoprens lan, dapre presisyon Asosyasyon nasyonal grefye ayisyen yo.

Li fè konnen se pa pou premye fwa y ap vòlè dosye ak prèv nan grèf tribinal sivil Pòtoprens lan, akòz espas, kote palè jistis la trouve l lan, pa gen bon jan nivo sekirite.

Mèt Martin Ainé anonse grefye yo kapab kanpe travay ankò, si otorite lajistis konsènen yo pa pran bon jan dispozisyon, pou mete bon jan dispozisyon sekirite nan lokal palè jistis la, sou bisantnè, Pòtoprens.

About the Author

Leave a Reply

*