USA: +1-754-4266-3266 / Haïti: +509-4483-9758 | raynaldlouis@gmail.com

Ayiti-Ekonomi : Fason mache a òganize lakoz pri divès pwodui pa desann, nan menm nivo ak dola a, dapre ekonomis Enomy Germain

Pòtoprens, 26 oktòb 2020 [AlterPresse] — Pri divès pwodui pa desann, nan menm nivo ak dola a, akoz makònay ki genyen sou mache a, dapre ekonomis Enomy Germain.

Ekonomis lan t ap fè analiz sou sitiyasyon ekonomi peyi a, nan emisyon Ti Chèz ba, sou AlterRadio.

Fason mache a òganize, nan peyi a, ki pa pèmèt pri pwodui yo bese yon fason otomatik, lakoz pri divès pwodui pa desann, nan menm nivo ak dola a, dapre ekonomis Enomy Germain.

Nan peyi d Ayiti, pa gen konkirans kòmsadwa sou mache a. Anplis, sektè yo nan ekonomi a pa dakò pou pri pwodui yo bese, jan popilasyon an swete sa.

Enomy Germain mande otorite Leta yo ankouraje konkirans, k ap anpeche kèk sektè fè dappiyanp sou mache a, nan peyi a.

Lè yon lajan nasyonal ap pran valè, li gen efè pozitif, menm jan li gen efè negatif tou. Nan yon sans kou yon lòt, ap gen moun k ap genyen, ap gen moun k ap pèdi. Se sa ekonomis Eddy Labossière deklare, sou bò pa l, nan yon nòt.

Douvan yon sityasyon konsa, gouvènman an gen pou responsablite bay moun ki pèdi yo akonpanyman kòmsadwa.

Ekonomis Eddy Labossière di li pa pran oserye deklarasyon yon responsab, nan Fon monetè entènasyonal, Alejandro Werner, ki fè konnen, li klè Ayiti pral sibi efè goud lan, k ap pran valè douvan dola ameriken an.

Eddy Labossière di Fon monetè entènasyonal pa itil peyi d Ayiti anyen.

Lendi 26 oktòb 2020 an, ou bezwen plis pase 62 goud pou yon dola ameriken.

About the Author

Leave a Reply

*